兴安路(兴安路141弄)

#头条创作挑战赛#

交关人用“华美”迭个词来形容淮海中路，听上去是勒讲件锦袍。张爱玲讲：“生命是一袭华美个袍，里向爬满了虱子”，搿是属于伊个见解，当然搭淮海路无关。假使拿淮海路比喻成件锦袍，葛末，原来是雍容华贵个“霞飞路”是面子，南昌路、淡水路、马当路、长乐路、自忠路……等等，就是“夹里”。是迭些“夹里”马路个品味，造就了淮海路个华美。其中有条拨大家经常忽视个小马路：兴安路，就有老多故事好讲。

兴安路勒淮海路以南，东起嵩山路，西抵雁荡路，总共只有五六百米，老上海人讲起来是“一站路”。南北高架拿兴安路一分为两，从兴安路个西头走到东头，要穿过天桥。

兴安路筑于1902年，只比淮海路小一岁。最初名字是“汉江路”，1907年以法租界公董局总董个名字更名为“麦赛尔蒂罗路”。1946年更名为兴安路。或许有人认为，“兴安”得名搭大小兴安岭有关，其实勿是个，兴安是广西个一只小县城，现在属于桂林市管辖。淮海路周边个小马路有交关以小县城命名，像桃源路、普安路、龙门路、柳林路……等等，兴安路也勿例外。

九十年代之前个兴安路，两旁边是密密麻麻个居民区，东段有得瑞康里、宝康里等石库门，中段有祥茂新邨、三德坊、四明里等新式里弄。配合淮海路商圈个发展，南北高架以东个兴安路已经老难寻得到当年个景象。高架以西还有大约一百米个兴安路，仍旧有生机勃勃市井气象。

讲搿段兴安路是淮海路个“夹里”，一点也勿为过。因为路北侪是妇女用品商店个后门，路南开满了各色小店，水果店、餐厅、咖啡馆……弄堂深深深几许，还住过勿少名人。

兴安路141弄鸿安坊搭重庆南路相通，四十年代，搿条弄堂以居住众多医生而出名。粗数数，6号沈伟昶、11号夏仲方、12号张万超，16号个潮州和济医院，当然最有名个就是4号里个山东名医魏指薪了。

当代中医伤科名医魏指薪（1896-1984），山东曹县人，1925年，山东受自然灾害，魏指薪29岁，一家头到上海，除脱一袭长衫搭仔笔墨纸砚之外，所有个只有自家个一套祖传伤科医术。开始辰光，勒南市关帝庙（现在个复兴东路）空地前头摆摊教人家打拳，后来勒南市方浜路吉祥里挂牌行医，因为医术高超，逐渐有市场了。1937年抗战全面爆发，伊搬进租界，住进鸿安坊，除脱开私人诊所之外、还勒育才中学教武术维持生计。伊勒重庆南路办个诊所，囡儿女婿一家门五个人一道应诊，一时传为美谈。魏指薪后来担任上海第二医学院（现在个交大医学院）中医骨伤科教授、瑞金医院伤科主任等，老卢湾人看过“魏氏伤科”个人，勿在少数。

除脱诊所，搿段兴安路另一特色是“吃”。老多卢湾个老人欢喜南昌路雁荡路口个老店“洁而精川菜馆”，搿家店原来开勒兴安路浪个，门牌号是133号。1927年，洁而精刚刚营业，经营云南风味，有得传说讲老板是蔡锷将军个红颜知己小凤仙。到1937年，老洁而精生意淡了，新老板转而经营川帮菜肴搭仔扬州点心，一举成功。尤其勒文艺界当中享有盛誉。周恩来欢喜个干煸牛肉丝，电影明星赵丹个心头好是青豆泥，书画家吴湖帆个最火系麻婆豆腐……画家刘海粟欢喜洁而精个生爆鳝背，有题字“其味无穷”。1958年洁而精搬到科学会堂，到现在133个门牌还勒海，画家贺友直先生曾经有幅“顶早个洁而精”，可以让人想象伊当年个盛况。

雁荡路浪还有家大名鼎鼎个面馆“味香斋”，搭兴安路也有老大个关系。四十年代，一个叫解豫凡个年轻人勒兴安路171号开了西冷点心搭客饭个老店，因为生意红火，又勒雁荡路开设西冷咖啡冷饮店，搿家经营咖啡冷饮个新店解放之后改名叫味香斋，从经营咖啡冷饮改为以麻酱拌面小牛汤为特色。兴安路浪个西冷老店解放之后是新光图片摄影社个暗房。民国时代曾经有“华龙路上二西冷”（雁荡路原名华龙路）个讲法，兴安路是味香斋个起源。

现在搿段兴安路，延续了当年“吃”个传统，勒沿街个百年老门面里开出了交关新店。一家以“兴安”命名个小餐厅，主打本帮特色，大众化消费，引来众多食客追捧。老板曾经学过日本料理，从中得到灵感，研制出牛肉草头、咸蛋黄排条等邪气有创意个菜品，搿些菜现在已经成为上海菜里个新经典。而兴安餐厅廿多年还是原来个样子，菜单是塑封打印个，浓浓个九十年代风。假使侬是熟客，伊拉会得默默个记牢，当侬移动平台下单辰光，账单浪“门店老客户”五个字，已经足够让人感到温馨，下趟点单辰光，当然第一个想到个就是伊拉了。

兴安路浪还有家老有特色个小店：徐其修凉茶。吃惯了罐头凉茶个朋友假使到搿搭寻味，可能要有点小小个心理准备，因为伊个招牌蒲公英、鱼腥草等，味道类似中药，属于“苦凉茶”，是有一定药效个。徐其修是否是上海仅有个广东凉茶铺，我勿敢断言。但笔者眼睛所看到个，经营正宗广东凉茶个，其他地方好像还呒没看到过。既然到上海滩了，老广也要入乡随俗。除脱苦茶，此地还有龟苓膏、芝麻糊、茅根竹蔗水、陈皮红豆沙等广东糖水。有苦也有甜，或者苦尽甘来，像极了我伲个生活。

一代又一代来自五湖四海个上海人勒搿搭生活，来来往往、熙熙攘攘。淮海路繁花似锦。背后个“夹里”温暖贴肉。百来米短短个兴安路，有一百廿年长长个历史，啥人又好讲伊，只是条“小”马路呢。